कोंबडी रस्सा (चिकन रस्सा) - Kombdi Rassa (Chicken Masala)

कोंबडी रस्सा (चिकन रस्सा) - Kombdi Rassa (chicken masala)

चमचमीत झणझणीत आणि करायला अगदी सोप्या अशा कोंबडी रस्श्याची (चिकन मसाला) पाककृती मी देत आहे. भाकरी, वडे, आंबोळी, चपाती, भात या सगळ्यांसोबत कोंबडी रस्श्याची चव न्यारीच लागते. चला तर मग करूया सुरुवात.

यासाठी लागणार साहित्य पाहून घेऊ.

=========== साहित्य =============

1. कोंबडी - अर्धा किलो
2. आलं,लसूण,मिरची,कोथिंबीर पेस्ट - ३ चमचे
3. हळद - पाव चमचा
4. लाल तिखट - ४ चमचे
5. तूप - १ चमचा
6. हिंग - पाव चमचा
7. दही - १ चमचा
8. मीठ
9. तेल - ४ चमचे
10. कांदा - १ बारीक चिरून
11. कांदा खोबरं गरम मसाला वाटण - २ मोठे चमचे

=========== कृती ============

--- प्रथम कोंबडी / चिकन २ ते ३ वेळा स्वच्छ धुवून घ्या.

--- आता आलं - २ इंच , लसूण - ८ ते ९ पाकळ्या , हिरवी मिरची - २, कोथिंबिर - १ कप घेऊन त्याची पेस्ट करून घ्या.

--- कोंबडी / चिकन ला वरील पेस्ट ३ चमचे, हळद, लाल तिखट, दही, हिंग, तूप, मीठ लावून दीड ते दोन तास मॅरीनेट करत ठेवायचं .

--- गॅस वर पातेलं ठेऊन त्यात ४ चमचे तेल गरम करून बारीक चिरलेला कांदा परतून घ्यायचा.

--- कांदा मऊ होईपर्यंत परतून झाला की गॅस मोठा ठेऊन त्यात मॅरीनेट केलेलं चिकन चांगलं परतून घ्यायचं. बाजूने तेल छान परतून घ्यायचं सुटेपर्यंत, यामुळे चिकनची चव अजून वाढते.

--- आता बारीक गॅस करून झाकणात पाणी ठेऊन २ मिनिटांची वाफ येऊ द्या.

--- दुसऱ्या बाजूला जितका रस्सा हवा त्या अंदाजाने पाणी गरम करत ठेवा.

--- २ मिनिटांनी झाकण काढून चिकन थोडं परतून झालं की त्यात गरम केलेलं पाणी घाला.

--- आपण चिकन मॅरीनेट करताना मीठ लावलेलं होत त्यामुळे रस्श्याची चव घेऊन अंदाजाने हवे असल्यास मीठ घाला.

--- पातेलीवर झाकणात पाणी ठेऊन ४० ते ४५ मिनिट कोंबडी / चिकन शिजू द्या.

--- तुम्ही कोंबडी / चिकन कुकर ला शिजवणार असाल तर ४ शिट्या काढा. चिकन छान शिजतं.

--- ४० ते ४५ मिनिटांनी चिकन शिजलंय ना चेक करून त्यात कांदा खोबरं गरम मसाला वाटण घालून मिक्स करा.

--- वाटण घालून ५ मिनिट बारीक गॅस वर चिकन शिजू द्यायचं.
--- कांदा खोबरं गरम मसाला वाटण पाककृती लिंक

--- वरून चिरलेली कोथिंबीर घातली की मस्त चमचमीत, झणझणीत कोंबडी रस्सा / चिकन रस्सा तयार.