नारळी भाताची पाककृती - Recipe of Narali Bhaat

नारळी भाताची पाककृती - Recipe of Narali Bhaat



कोकणात श्रावणी पौर्णिमेला नारळी भाताचा नैव्येद्य दाखविला जातो; त्याच पारंपारिक नारळी भाताची पाककृती या ब्लॉगमध्ये देत आहोत.
ही पाककृती करायला अगदी सोप्पी आहे. आणि आपण ती अगदी झटपट करू शकतो.

चला तर मग अजून जास्त न बोलता लगेचच सुरु करू. नारळी भाताला लागणारे साहित्य आपल्या घरात सहजच उपलब्ध असते.

• १ कप तांदूळ
• १ कप खोवलेला (खरवडलेला / किसलेला) ओला नारळ
• १ कप गुळ (किसलेला)
• ४ लवंगा
• २ टेबल स्पून शेंगदाणे (२ तास भिजवून सोललेले)
• ४-५ काजूगर
• ४ टेबल स्पून तूप
• वेलची पूड
• दीड कप पाणी
• चवीनुसार मीठ

नारळी भात बनविण्याची कृती:

• एका कुकर मध्ये २ चमचे तूप घेऊन त्यात ४ लवंगा घालाव्यात.
• आता तांदूळ स्वच्छ धुवून तो ही त्यात घालावा. आणि एक मिनिटभर छान परतून घ्यावा.
• दीड कप पाणी घालून कुकर ला २ शिट्ट्या येऊ द्याव्यात.

कुकर मध्ये तुपात ४ लवंगा घाला

त्यात तांदूळ आणि पाणी घाला

आपला भात तयार होईस्तोवर आपण पुढील तयारी करून घेऊया.

• एका भांड्यात खोबरं आणि गुळ छान कालवून घ्या. चांगलं एकजीव होऊदे.

गुळ खोबरे एकजीव करून घ्या

• आता (भात तयार झाल्यावर) एका जाड बुडाच्या पातेल्यात २ चमचे तूप छान गरम करून घ्या.
• त्यात शेंगदाणे आणि काजूगर घालून छान तांबूस होईतोवर परतून घ्या.
• नंतर आपण तयार केलेले गुळ खोबऱ्याचे मिश्रण घाला.
• आणि गुळ पूर्णपणे विरघळेपर्यंत थांबा.

गुळ पूर्णपणे विरघळू द्या

• गुळ विरघळल्यावर आता तयार भात त्यात घालावा आणि छान एकजीव होईतोवर हलवा.
• भांड्याला ताटली घालून २ मिनिटे चांगली वाफ येऊद्या.
• एकदा छान परतून घ्या आणि अजून २ मिनिटे वाफ द्या.

त्यात भात आणि वेलची पूड घाला

• बस्स आता फक्त त्यात वेलची पूड घाला आणि तयार झाला आपला कोकणी पद्धतीचा नारळी भात.

तयार आहे आपला नारळी भात

मस्त मूद पडून गरम गरम वाढा